Penumboh Ministri Iban ba St. Mary’s Cathedral, Kuala Lumpur siti ari berkat Tuhan ti pemadu besai ba bansa Iban ti diau di Semenanjung Malaysia. Tu meh nyadi ka tanda Tuhan udah merkat, lalu Iya deka bekerja ba bansa kitai Iban. Nama asal ministri tu maia tu dikumbai ‘Sambiang Jako Iban’, lalu diatu ia di kumbai ‘Ministri Iban’. Pemun ia di tumboh ka bedudok ari peminta bala Iban ti bisi sambiang di St. Mary’s, maia tu sida sambiang enggau Servis Bahasa Inggeris. Pemaioh tuboh raban Iban ti datai bersambiang lebih kurang dalam 50 – 100 iko. Bala kemiti gerija besai meda pemaioh tuboh makin bertambah dia bisi ati deka numboh ka Sambiang Jako Iban, tambah mega maia tu udah bisi Sambiang dalam jako Bahasa Malaysia, ari raban menyadi kitai ari negeri Sabah.
Puji Tuhan ! Enggau peneka Tuhan mega penumboh Ministri Iban udah dikemendar ka bala kemiti ba aum Kunsil Gerija (PCC). Dean Gerija,nya The Very Rev. Jason Selvaraj ti udah ngemendar ka penumboh Sambiang Jako Iban tu. Pemendar tu di gaga awak meri peluang ngagai bansa Iban sambiang ngena jako diri empu, serta bisi endor ngaga kaul antara raban Iban ti diau di Kuala Lumpur ditu. Dean Jason bisi pengerindu hati meda pemangsang tuboh bala Iban ti datai bersambiang, lalu nyukong numboh ka gempuru Iban tu endor ngempong semua Iban ti diau tauka bekerja di Kuala Lumpur, enda ngira ari ni penatai serta batang pengarap sida, baik ka ari Anglikan, Roman Katolik, SIB, Methodist tauka batang pengarap ti bukai. Tuju Ministri tu deka ngempong bansa Iban ngena jalai pengarap ka Tuhan Jesus Kristus
Ketuai ti keterubah ia ngulu pengawa ngator sambiang tu, nya Lay Reader Dunstan Ranggau. Iya nya siko ari bansa kitai Iban ti nyadi Lay Reader ba gerija St. Mary’s tu. Pengawa ia mega di bantu ulih Mr. George Manggie ( ti udah nya lalu di padu ka nyadi Lay Reader Iban ke-2). Pengawa seduai ia mega di sukong, ditulong, serta di saup ulih bala-bala Iban bukai ti sama begempong ngemeran ka penumboh ministri tu.
Secara ‘rasmi’ penumboh ministri tu ia nya berengkah dalam tahun 2002. Kena 8 hb September 2002 (hari Minggu), jam 11.00 pagi, Sambiang Jako Iban ti keterubah di gaga ba St. Mary’s Cathedral, Kuala Lumpur. Tu nyadi ka tanda pemun penumboh sambiang Hari Minggu ngena jako Iban. Penyampau tuboh raban Iban ti bisi datai maia tu ianya kira-kira 126 iko besai tuai enggau 18 iko anembiak. Sambiang tu diulu ke ulih The Very Rev. Aeries Sumping Jingan, ti datai ari St. Thomas, Kuching, Sarawak. Enggau penatai ia tu mega, ia lalu bejadi ke penumboh Sambiang Jako Iban ba St. Mary’s, Kuala Lumpur.
Bepun ari 8 hb September 2002, dia sambiang Hari Minggu ngena Jako Iban lalu di terus ka nyentok ka saritu. Ketegal ti nadai Paderi ba bansa Iban empu, dia gerija besai meri orang ti ngulu /’celebrant’ ba ministri tu Paderi bansa bukai (Tamil), nya Rev. Davis Sigamoney, serta di bantu ulih 2 iko Lay Readers, Lyr Dundatn Ranggau enggau Lyr George Manggie. Paderi tu mega naka ulih belajar dalam jako Iban, lalu ia diatu nyau udah nemu bendar ngulu ka sambiang tu ngena jako Iban. Pengawa sambiang tu mega diator enggau manah ulih saup bala-bala Iban ti meri sukong ti amat maioh ngagai penumboh ministri tu. Group koir serta server mega di tumboh ka, lalu di ulu ka ulih Bro. Andrew Som enggau Sis. Roseleena Johnaton Ringgit.
Di kena ngemanah ka agi ator pengawa dalam Sambiang Jako Iban, dia bala bisi baum, lalu bersetuju numboh ka bala kemiti ti keterubah mangku pengawa gerija, lalu di beri nama Sarawak Support Group (SSG). Pengawa bepilih kemiti SSG di gaga, lalu bala kemiti ti udah di padu ka baka dibaroh tu:
Advisor : Mr. Risug Jute
Chairman : Mr. George Manggi
Vice-Chairman : Mr. Abang Nuga
Hon Secretary : Mr. Dunstan Ranggau
Hon Treasurer : Mr. Andrew Som
Bala Kemiti:
Mr. Meramat Tabor
Mr. Suil Nyanau
Mr Kenneddy Aben
Mr. David Bong & Ms. Nancy Song.
Bedudok ari tu, pengawa gerija terus ngerembai. Pengawa bukai ti sama berengkah, nya baka numboh ka Gerempong Indu, Sekula Minggu enggau Nembiak Rebak Baru, belajar ka Bup Kudus (Bible Study), ngabas orang ti sakit di sepital, gempuru di rumah (House Fellowship), besambiang berterima kasih di rumah, bantu rama serta pengawa bukai.
Dalam pengelama tu mega, Ministri Iban berasai amat beterima kasih ka saup bantu bala Paderi bukai dalam ngemujor ka pengawa sambiang tu, kelebih agi bala Paderi ti bisi datai belajar ke Semenanjung ditu, baka sida Rev. Jamal Senada, Rev. Witty Kedu enggau bala-bala Paderi bukai ti bisi datai nemuai ke Kuala Lumpur, baka Rev. Dennis Gimang enggau Dean Aries Sumping. Bala Lay Reader mega udah bertambah, nya Lay Reader Eddy Laga, ti udah di padu nyadi Lay Reader ba Ministri tu. Naka ke diatu ministri kala di ulu ke bala Pastor ti kerja penuh (‘full time’), baka Pastor Edric Darn, lalu ia diatu udah diganti ulih Pastor Iben Arang ti nyadi Pastor Ministri Iban nyentok ke sari tu. Chairman ministry tu mega kala di ketuai ka Mr. Alex Abraham, lalu ke diatu udah diganti ulih Mr. Duwen Babat.
Ministri Iban terus mangsang lalu bisi ator ti manah, tiap-tiap taun minsitri tu bisi ngaga Aum Ninting Taun (AGM), endor bepilih ke bala kemiti ti gawa ka pengawa gerija. Naka ke diatu Ministri Iban bisi Kemiti Gempuru Sel, Kemiti Gempuru, Rama & Bantu, Ministri Indu, Ministri Muzik serta Ministri Anembiak Rebak Baru.
Ba tahun 2007 tu, masuk tahun ke-5 ministri tu udah di tumboh ka. Pengelama tu maioh amat insor mansang ba ministri tu, ari saup bantu, sukong enggau kerja bebendar bala raban Iban. Tu nyadi perangsang, lalu ka tanda Tuhan amat-amat rindu ka bansa kitai Iban. Tuhan deka bekerja ba bansa kitai, lalu bansa kitai deka diangkat ka nengah Pengerindu Tuhan Jesus. Maioh amat pemanah ti udah ayan ari penumboh ministri tu. Raban Iban majak maioh datai ngagai Rumah Tuhan, ngelala serta ngayan ka pengidup Tuhan ti betul-betul idup dalam kitai. Kitai besampi enggau penuh pengandal Tuhan merkat ka ministri tu, ulih peneka Iya Ministri Iban terus mangsang, ngerembai, angkat serta mai maioh agi raban Iban datai nyembah Tuhan. Tuhan Merkati Semua Bansa Kitai.
